| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 43.54 | Dem. 43.57 (English) | >>Dem. 43.59 |
43.55ἃ μὲν λέγει ὁ νόμος , ὦ ἄνδρες δικασταί , ἀκούετε . ὅτε δὲ τῆς ἐπικλήρου ἔδει ἐπιδικάζεσθαι Φυλομάχης τῆς τουτουὶ μητρὸς τοῦ παιδός , Ἁγνίου δὲ ἀνεψιοῦ παιδὸς οὔσης πρὸς πατρός , ἐγὼ μὲν ἧκον φοβούμενος τὸν νόμον καὶ ἐπεδικαζόμην γένει ὢν ἐγγυτάτω , Θεόπομπος δὲ ὁ Μακαρτάτου πατὴρ οὐδὲ προσῆλθεν τὸ παράπαν οὐδὲ ἠμφεσβήτησεν διὰ τὸ μηδʼ ὁτιοῦν αὐτῷ προσήκειν , καὶ ταῦτα ἐν τῇ ἡλικίᾳ ὢν τῇ αὐτῇ .
43.56καίτοι πῶς οἴεσθε , ὦ ἄνδρες δικασταί , ἄτοπον εἶναι , τῆς μὲν ἐπικλήρου , ἣ ἦν Ἁγνίᾳ ἀνεψιοῦ παῖς πρὸς πατρός , ταύτης μὲν μηδεπώποτε ἀμφισβητῆσαι Θεόπομπον , τὸν δὲ κλῆρον τὸν Ἁγνίου ἀξιοῦν ἔχειν παρὰ τοὺς νόμους ; τούτων γένοιντʼ ἂν ἄνθρωποι ἀναισχυντότεροι ἢ μιαρώτεροι ; ἀναγίγνωσκε καὶ τοὺς ἑτέρους νόμους .
43.57
Νόμοι
προειπεῖν τῷ κτείναντι ἐν ἀγορᾷ ἐντὸς ἀνεψιότητος καὶ ἀνεψιοῦ ,συνδιώκειν δὲ καὶ ἀνεψιοὺς καὶ ἀνεψιῶν παῖδας καὶ γαμβροὺς καὶ πενθεροὺς καὶ φράτερας .αἰδέσασθαι δέ ,ἐὰν μὲν πατὴρ ᾖ ἢ ἀδελφὸς ἢ υἱεῖς ,ἅπαντας ,ἢ τὸν κωλύοντα κρατεῖν .ἐὰν δὲ τούτων μηδεὶς ᾖ ,κτείνῃ δὲ ἄκων ,γνῶσι δὲ οἱ πεντήκοντα καὶ εἷς ,οἱ ἐφέται ,ἄκοντα κτεῖναι ,ἐσέσθων οἱ φράτερες ,ἐὰν ἐθέλωσι ,δέκα ·τούτους δὲ οἱ πεντήκοντα καὶ εἷς ἀριστίνδην αἱρείσθων .καὶ οἱ πρότερον κτείναντες ἐν τῷδε τῷ θεσμῷ ἐνεχέσθων . —τοὺς δʼ ἀπογιγνομένους ἐν τοῖς δήμοις ,οὓς ἂν μηδεὶς ἀναιρῆται ,ἐπαγγελλέτω ὁ δήμαρχος τοῖς προσήκουσιν ἀναιρεῖν καὶ θάπτειν καὶ καθαίρειν τὸν δῆμον ,τῇ ἡμέρᾳ ᾗ ἂν ἀπογένηται ἕκαστος αὐτῶν .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 43.54 | Dem. 43.57 (English) | >>Dem. 43.59 |
